ᱠᱤᱨᱛᱟ. ᱰᱟᱸᱜᱽᱨᱟ -- ᱢᱤᱫ ᱦᱩᱰᱤᱧ ᱚᱯᱚᱨᱚᱢ ᱚᱱᱚᱞᱤᱭᱟ. -- ᱥᱤᱵᱩ ᱴᱩᱰᱩ

Shibu Tudu

Illustration by Emma Roulette

ᱠᱤᱨᱛᱟ. ᱫᱚ ᱥᱟᱱᱛᱟᱞ ᱯᱟᱨᱜᱟᱱᱟ ᱨᱮᱭᱟᱜ ᱱᱤᱛ ᱢᱮᱱᱟᱜ ᱯᱟᱠᱩᱲ ᱡᱤᱞᱟ. ᱨᱮᱱᱟᱜ ᱢᱟᱦᱮᱥᱯᱩᱨ ᱵᱚᱞᱚᱠᱽ ᱨᱮ ᱢᱟᱦᱮᱥᱯᱩᱨ-ᱯᱟᱠᱩᱲ ᱨᱳᱰᱽ ᱨᱮ ᱢᱟᱦᱮᱥᱯᱩᱨ ᱠᱷᱚᱱ ᱘-᱙ ᱠᱤᱞᱳᱢᱤᱴᱟᱨ ᱯᱟ.ᱪᱷᱤᱢ ᱨᱮ ᱢᱮᱱᱟᱜ ᱢᱤᱫ ᱦᱩᱰᱤᱧ ᱟᱛᱳ ᱜᱮ᱾ ᱱᱚᱣᱟ ᱟᱛᱳ ᱫᱚ ᱦᱤᱱᱫᱤ ᱛᱮ ᱠᱤᱨᱚᱛᱟ ᱜᱳᱞᱤᱠᱟᱸᱰᱽ ᱧᱩᱛᱩᱢ ᱛᱮ ᱟᱰᱤ ᱜᱮ ᱱᱟᱢᱰᱟᱠᱽ ᱜᱮᱭᱟ᱾ ᱱᱚᱣᱟ ᱟᱛᱳ ᱨᱮᱭᱟᱜ ᱠᱟᱸᱰ ᱫᱚ ᱦᱚᱲ ᱛᱮ ᱠᱤᱨᱛᱟ. ᱰᱟᱸᱜᱽᱨᱟ ᱧᱩᱛᱩᱢ ᱛᱮᱠᱚ ᱛᱷᱩᱛᱤ ᱟ.ᱜᱩᱭᱮᱫ ᱠᱟᱱᱟ᱾ ᱟ.ᱰᱤ ᱜᱮ ᱱᱟᱢᱰᱟᱠᱽ ᱠᱟ.ᱦᱱᱤ ᱜᱤᱫᱨᱟ. ᱟᱨ ᱜᱚᱲᱚᱢ ᱦᱟᱲᱟᱢ ᱠᱚ ᱛᱟᱞᱟ ᱨᱮ ᱦᱳᱭ ᱟᱠᱟᱱᱟ᱾ ᱮᱱᱛᱮᱫ ᱠᱤᱨᱛᱟ. ᱰᱟᱸᱜᱽᱨᱟ ᱛᱟᱭᱚᱢ ᱨᱮᱱ ᱦᱟᱲᱟᱢ ᱵᱟ ᱫᱚ ᱟᱠᱚ ᱨᱮᱱ ᱜᱚᱲᱚᱢ ᱜᱤᱫᱨᱟ. ᱠᱚ ᱱᱚᱣᱟ ᱰᱟᱸᱜᱽᱨᱟ ᱵᱟᱵᱚᱛ ᱨᱮᱭᱟᱜ ᱠᱟ.ᱦᱱᱤ ᱛᱮᱠᱚ ᱞᱟ.ᱭ ᱵᱩᱞᱟ.ᱣ ᱠᱟᱠᱚ ᱠᱟᱱ ᱛᱟᱸᱦᱮᱠᱟᱱ ᱛᱟᱦᱮᱸ ᱠᱟᱱᱟ᱾

ᱱᱚᱣᱟ ᱠᱤᱨᱛᱟ. ᱰᱟᱸᱜᱽᱨᱟ ᱠᱟ.ᱢᱤ ᱦᱟᱨᱟ ᱨᱮᱭᱟᱜ ᱢᱤᱢᱤᱫ ᱜᱷᱚᱴᱱᱟ ᱜᱮ ᱛᱮᱦᱮᱧ ᱫᱚ ᱢᱟᱱ ᱦᱚᱯᱱᱟ ᱥᱚᱨᱮᱱ, ᱟᱛᱳ ᱞᱚᱜᱟᱸᱣ, ᱟᱨ ᱢᱟᱱ ᱪᱮᱰᱮ ᱴᱩᱰᱩ, ᱟᱛᱳ ᱠᱷᱤᱲᱤᱵᱟᱲᱤ, ᱣᱟᱠ ᱢᱮᱫ ᱧᱮᱞ ᱟᱨ ᱞᱩᱛᱩᱨ ᱟᱺᱡᱚᱢ ᱠᱟᱛᱷᱟ ᱞᱮᱠᱟᱛᱮᱵᱚᱱ ᱩᱭᱦᱟ.ᱨ ᱨᱩᱣᱟ.ᱲᱟ, ᱟᱨ ᱫᱤᱥᱟ. ᱨᱩᱣᱟ.ᱲ ᱠᱚᱣᱟ ᱵᱚᱱ ᱳᱱᱠᱳ ᱥᱟᱭ-ᱥᱟᱭ ᱦᱚᱲ ᱚᱠᱚᱭ ᱫᱚ ᱱᱚᱣᱟ ᱰᱟᱸᱜᱽᱨᱟ ᱠᱟ.ᱢᱤ ᱦᱚᱨᱟ ᱨᱮ ᱥᱟᱱᱛᱟᱲᱟᱠ ᱡᱟ.ᱛᱽ, ᱥᱟ.ᱜᱟ.ᱭ, ᱟᱨ ᱚᱯᱚᱨᱚᱢ ᱵᱟᱧᱪᱟᱣ ᱞᱟ.ᱜᱤᱫ ᱛᱮ ᱟᱠᱚᱣᱟᱜ ᱡᱤᱻᱣᱤ ᱠᱚ ᱟᱞᱟᱭ ᱟᱠᱟᱫ᱾

ᱱᱩᱠᱤᱱ ᱢᱟᱱᱚᱛᱟᱱᱟᱠ ᱞᱟ.ᱭ ᱞᱮᱠᱟᱛᱮ ᱵᱚᱨᱥᱚᱱ ᱢᱩᱨᱢᱩ ᱧᱩᱛᱩᱢᱟᱱ ᱠᱷᱤᱲᱤᱵᱟᱲᱤ ᱟᱛᱳ ᱨᱮᱱ ᱢᱤᱫ ᱠᱚᱲᱟᱭ ᱛᱟᱸᱦᱮ ᱠᱟᱱᱟ᱾ ᱵᱚᱨᱥᱚᱱ ᱫᱚ ᱥᱟᱱᱛᱟᱲᱤ ᱟ.ᱨᱤ ᱞᱮᱠᱟᱛᱮ ᱠᱤᱨᱛᱟ. ᱟᱛᱳ ᱨᱮᱱ ᱢᱟ.ᱡᱷᱤ ᱡᱷᱟᱲ ᱨᱮᱱ ᱠᱩᱲᱤ ᱦᱚᱯᱚᱱ ᱵᱚᱰᱜᱮ ᱥᱟᱸᱣ ᱡᱩᱨᱤ-ᱯᱟ.ᱨᱤ ᱛᱚᱱᱚᱞ ᱥᱤᱠᱲᱤ ᱛᱮᱭ ᱛᱚᱞ ᱢᱤᱫ ᱞᱮᱱᱟ᱾ ᱛᱷᱚᱲᱟ ᱫᱤᱱ ᱛᱟᱭᱚᱢ ᱵᱟᱝ ᱫᱚ ᱯᱩᱨᱩᱵ ᱦᱚᱭ ᱟᱨ ᱵᱟᱝ ᱫᱚ ᱯᱟ.ᱪᱷᱤᱢ ᱦᱚᱭ ᱨᱮᱭᱟᱜ ᱟᱺᱪ ᱱᱩᱠᱤᱱᱟᱜ ᱡᱩᱨᱤ-ᱯᱟ.ᱨᱤ ᱡᱤᱭᱟ.ᱱ ᱨᱮ ᱯᱟᱲᱟᱣ ᱮᱱᱛᱮ ᱵᱟᱱᱟ ᱦᱚᱲ ᱯᱷᱟᱨᱟᱠᱽ-ᱯᱷᱟᱨᱟᱠᱽ ᱜᱮᱠᱤᱱ ᱛᱟᱸᱦᱮ ᱮᱱᱟ᱾

ᱵᱚᱨᱥᱚᱱ ᱢᱩᱨᱢᱩ ᱫᱚ ᱟᱠᱚ ᱚᱲᱟᱠ ᱠᱷᱤᱲᱤᱵᱟᱲᱤ ᱨᱮ ᱟᱨ ᱠᱩᱲᱤ ᱫᱚ ᱟᱠᱚ ᱟᱛᱳ ᱠᱤᱨᱛᱟ. ᱨᱮ᱾ ᱱᱚᱣᱟ ᱛᱚᱞᱦᱟᱸᱴᱽ ᱨᱮᱱ ᱥᱟᱱᱟᱢ ᱥᱟᱱᱛᱟᱲ ᱦᱚᱲ ᱜᱮ ᱡᱚᱠᱷᱚᱡ-ᱡᱚᱠᱷᱚᱡ ᱨᱮ ᱵᱟ.ᱜᱲᱤ ᱫᱤᱥᱚᱢ ᱫᱚ ᱠᱚ ᱩᱭᱦᱟ.ᱨ ᱤᱫᱤ ᱜᱮᱭᱟ, ᱚᱠᱟ ᱫᱚ ᱢᱟ.ᱥᱨᱤ ᱛᱩᱢᱟ.ᱞ , ᱚᱠᱟ ᱫᱚ ᱯᱮᱸᱭᱟᱡᱽ ᱛᱩᱢᱟ.ᱞ, ᱟᱨ ᱚᱱᱠᱟ ᱜᱮ ᱮᱢᱟᱱ ᱛᱮᱭᱟᱜ ᱵᱟᱦᱱᱟ ᱠᱟᱛᱮᱫ᱾ ᱱᱚᱣᱟ ᱩᱭᱦᱟ.ᱨ ᱦᱮᱣᱟ ᱫᱚ ᱵᱤᱴᱤ ᱵᱚᱰᱜᱮ ᱦᱚᱸ ᱵᱟ.ᱜᱲᱤ ᱪᱟᱞᱟᱣ-ᱦᱤᱡᱩᱜ ᱛᱮ ᱯᱟᱲᱟᱣ ᱟᱫᱮ ᱛᱟᱸᱦᱮ ᱠᱟᱱᱟ᱾ ᱵᱟ.ᱜᱲᱤ ᱪᱟᱞᱟᱜ-ᱦᱤᱡᱩᱜ ᱰᱟᱦᱟᱨ ᱨᱮᱜᱮ ᱢᱤᱫ ᱴᱷᱮᱱ ᱠᱟ.ᱭᱵᱟ.ᱛᱽ ᱠᱚᱲᱟ ᱢᱩᱴᱷᱟ.ᱱ ᱨᱮ ᱛᱟᱸᱦᱮᱠᱟᱱ᱾ ᱵᱮ ᱚᱨᱚᱢᱚᱜ ᱫᱷᱤᱨᱤ ᱨᱮ ᱛᱚᱦᱚᱫ-ᱛᱟᱠᱤᱧ ᱞᱮᱱ ᱛᱟᱭᱚᱢ ᱠᱷᱚᱱ ᱵᱚᱰᱜᱮ ᱫᱚ ᱵᱟ.ᱜᱲᱤ ᱪᱟᱞᱟᱜ ᱨᱮᱭᱟᱜ ᱩᱭᱦᱟ.ᱨ ᱫᱚ ᱟᱨ ᱛᱮᱫ ᱜᱮ ᱰᱷᱮᱨ ᱞᱮᱱ ᱛᱟᱭᱟ᱾ ᱚᱠᱛᱚ ᱵᱚᱫᱚᱞᱚᱜ ᱥᱟᱸᱣ-ᱥᱟᱸᱣ ᱛᱮ ᱵᱚᱰᱜᱮ ᱵᱤᱴᱤ ᱫᱚ ᱠᱟ.ᱭᱵᱟ.ᱛᱽ ᱠᱚᱲᱟ ᱢᱩᱴᱷᱟ.ᱱ ᱨᱮ ᱢᱮᱱᱟᱜ ᱫᱷᱤᱨᱤ ᱫᱚ ᱵᱚᱨᱥᱚᱱᱟᱜ ᱫᱩᱞᱟ.ᱲ ᱜᱤᱰᱤ ᱪᱷᱟᱰᱟ ᱠᱟᱛᱮᱫ ᱦᱚᱵᱚᱨ-ᱦᱮᱨᱢᱮᱫ ᱟᱛᱮᱭ ᱟ.ᱜᱩᱣᱟᱱᱟᱜ-ᱟ ᱟᱠᱚ ᱚᱲᱟᱜ ᱠᱤᱨᱛᱟ. ᱛᱮ᱾ ᱵᱚᱰᱜᱮᱭ ᱟ.ᱜᱩ ᱫᱟᱨᱟᱭᱟᱠᱟᱛ ᱠᱟᱛᱷᱟ ᱫᱚ ᱜᱚᱴᱟ ᱛᱚᱞᱦᱟᱸᱴᱽ ᱨᱮ ᱯᱟᱥᱱᱟᱣ ᱥᱟᱸᱣ-ᱥᱟᱸᱣ ᱛᱮ ᱵᱚᱨᱥᱚᱱᱟᱜ ᱞᱩᱛᱩᱨ ᱨᱮᱦᱚᱸ ᱛᱟ.ᱠᱤᱡ ᱛᱤᱭᱟ.ᱜ ᱮᱱᱟ᱾

ᱱᱚᱣᱟ ᱜᱷᱚᱴᱚᱱᱟ ᱟᱸᱡᱚᱢ ᱛᱤᱭᱟ.ᱜ ᱠᱟᱛᱮᱫ ᱵᱚᱨᱥᱚᱱ ᱢᱩᱨᱢᱩ ᱣᱟᱜ ᱵᱚᱦᱚᱜ ᱦᱟᱛᱟᱝ ᱫᱚ ᱟ.ᱣᱞᱟ.ᱣ ᱪᱟᱵᱟᱭᱮᱱ ᱛᱟᱭᱟ᱾ ᱟᱡ ᱢᱟᱨᱟᱝ ᱵᱟ ᱢᱟᱨᱟᱸᱜᱽ ᱢᱩᱨᱢᱩ ᱟᱨ ᱟᱛᱳ ᱨᱮᱱ ᱢᱤᱫ-ᱵᱟᱨ ᱠᱚᱲᱟ ᱠᱚᱭ ᱞᱟ.ᱭᱟᱛ ᱠᱚᱣᱟ ᱟᱨ ᱩᱱ ᱦᱤᱞᱚᱜ ᱧᱤᱫᱟ. ᱜᱮ ᱳᱱᱠᱳ ᱫᱚ ᱠᱟ.ᱭᱵᱟ.ᱛᱽ ᱠᱚᱲᱟ ᱥᱟᱵᱮ ᱞᱟ.ᱜᱤᱫ ᱠᱤᱨᱛᱟ. ᱛᱮᱠᱚ ᱪᱟᱞᱟᱣ ᱮᱱᱟ᱾

ᱛᱤᱱ ᱨᱮ ᱵᱚᱰᱜᱮ ᱛᱮᱠᱚᱣᱟᱠ ᱚᱲᱟᱜ ᱠᱚ ᱵᱚᱞᱚᱱ ᱠᱟᱱ ᱛᱟᱦᱮᱸᱠᱟᱱᱟ, ᱩᱱᱜᱮ ᱠᱟ.ᱭᱵᱟ.ᱛᱽ ᱠᱚᱲᱟ ᱫᱚ ᱢᱟᱨᱟᱸᱜᱽ ᱢᱩᱨᱢᱩ ᱞᱮᱸᱜᱟ ᱠᱚᱲᱟᱢ ᱨᱮ ᱪᱷᱩᱨᱤ ᱛᱮᱭ ᱥᱚᱵᱚᱠ ᱠᱮᱫᱮᱭᱟ᱾ ᱢᱟᱨᱟᱸᱜᱽ ᱢᱩᱨᱢᱩ ᱫᱚ ᱟ.ᱰᱤ ᱛᱟᱜᱽᱲᱟ ᱟᱨ ᱥᱟᱦᱚᱥ ᱦᱚᱲᱮ ᱛᱟᱦᱮᱸ ᱠᱟᱱᱟ᱾ ᱥᱮᱥ ᱨᱮ ᱠᱟ.ᱭᱵᱟ.ᱛᱽ ᱠᱚᱲᱟ ᱫᱚᱠᱚ ᱫᱟᱞ ᱞᱤᱴᱤᱯ-ᱞᱤᱴᱤᱯ ᱠᱮᱫᱮᱭᱟᱠᱚ ᱟᱨ ᱜᱚᱡ ᱮᱱᱟᱭ ᱢᱮᱱ ᱛᱮ ᱚᱸᱰᱮ ᱜᱮᱠᱚ ᱵᱟ.ᱜᱤ ᱦᱚᱴᱚᱣᱟᱫᱮᱭᱟ᱾ ᱢᱮᱱᱠᱷᱟᱱ ᱛᱷᱚᱲᱟ ᱫᱤᱱ ᱛᱟᱭᱚᱢ ᱛᱮᱠᱚ ᱵᱟᱰᱟᱭ ᱠᱮᱫᱟ ᱵᱟᱝ ᱢᱟ ᱩᱱᱤ ᱫᱚᱭ ᱵᱟᱧᱪᱟᱣ ᱮᱱᱟ᱾ ᱡᱤᱻᱣᱤᱛ ᱮᱱᱟᱭ᱾

ᱱᱚᱣᱟ ᱜᱷᱚᱴᱚᱱᱟ ᱛᱟᱭᱚᱢ ᱵᱟᱜᱰᱩᱵᱟ. ᱟᱛᱳ ᱨᱮᱱᱟᱜ ᱠᱟ.ᱣᱦᱟ. ᱫᱟᱞᱟᱦᱤ ᱴᱷᱮᱱ ᱯᱮ ᱫᱷᱟᱣ ᱛᱮ ᱢᱚᱬᱮᱸ ᱢᱟ.ᱡᱷᱤ ᱠᱚ ᱫᱩᱲᱩᱯ ᱞᱮᱱᱟ᱾ ᱢᱩᱪᱟ.ᱫ ᱫᱷᱟᱣ ᱨᱮ ᱫᱚ ᱠᱟᱜᱚᱡᱽ-ᱠᱚᱞᱚᱢ ᱦᱚᱸ ᱠᱚ ᱵᱮᱱᱟᱣ ᱞᱮᱫᱟ᱾ ᱪᱮᱫ ᱨᱟ.ᱭ ᱦᱳᱭ ᱞᱮᱱᱟ ᱫᱚ ᱵᱟᱝ ᱵᱟᱰᱟᱭ ᱞᱮᱱᱟ᱾ ᱛᱷᱚᱲᱟ ᱫᱤᱱ ᱛᱟᱭᱚᱢ ᱵᱚᱨᱥᱚᱱ ᱢᱩᱨᱢᱩ ᱫᱚ ᱢᱚᱬᱮᱸ ᱢᱟ.ᱡᱷᱤ ᱭᱟᱠ ᱨᱟ.ᱭ ᱛᱮ ᱵᱟᱭ ᱫᱷᱤᱨ ᱯᱩᱨ ᱞᱮᱱ ᱛᱮ ᱟᱡ ᱢᱟᱨᱟᱝ ᱵᱟ ᱟᱨ ᱟᱡ ᱵᱟᱵᱟ ᱵᱮ ᱞᱟ.ᱭ ᱛᱮ ᱦᱟᱯᱮ-ᱦᱟᱯᱮ ᱛᱮ ᱠᱤᱨᱛᱟ. ᱰᱟᱸᱜᱽᱨᱟ ᱧᱩᱛᱩᱢ ᱛᱮ ᱥᱚᱦᱚᱨᱜᱟᱶ ᱦᱟ.ᱴᱤᱭᱟ., ᱦᱤᱨᱚᱱᱯᱩᱨ ᱦᱟ.ᱴᱤᱭᱟ., ᱟᱨ ᱯᱟᱠᱩᱲ ᱦᱟ.ᱴᱤᱭᱟ. ᱨᱮ ᱰᱷᱟ.ᱨᱣᱟ. ᱜᱮ ᱟᱥᱮᱱ ᱠᱮᱫᱟ᱾ ᱱᱚᱣᱟ ᱰᱟᱸᱜᱽᱨᱟ ᱠᱟ.ᱢᱤ ᱦᱟᱨᱟ ᱨᱮᱱᱟᱜ ᱱᱮᱸᱰᱟ ᱫᱤᱱ ᱫᱚ ᱛᱟᱦᱮᱸ ᱠᱟᱱᱟ ᱒᱖ ᱡᱩᱱ ᱑᱙᱕᱖ ᱦᱤᱞᱚᱜ᱾

ᱱᱮᱸᱰᱟ ᱫᱤᱱ ᱯᱩᱨᱟ.ᱣ ᱠᱟᱱ ᱦᱤᱞᱚᱠ ᱵᱚᱨᱥᱚᱱ ᱫᱚ ᱥᱤᱢᱨᱟᱜ ᱨᱮ ᱟᱡ ᱢᱟᱢᱟ ᱦᱚᱯᱱᱟ ᱥᱚᱨᱮᱱ ᱴᱷᱮᱱ ᱞᱚᱜᱟᱸᱣ ᱟᱛᱳ ᱛᱟᱭ ᱥᱮᱱ ᱮᱱᱟ᱾ ᱮᱱᱛᱮᱫ ᱱᱟᱣᱟ ᱱᱮᱸᱰᱟ ᱫᱚ ᱩᱱᱤᱭᱟᱜ ᱥᱚᱞᱦᱟ ᱵᱮᱜᱚᱨ ᱛᱮ ᱱᱮᱸᱰᱟ ᱞᱮᱫᱟ᱾ ᱟᱭᱢᱟ ᱞᱮᱠᱟᱱᱟᱜ ᱵᱚᱛᱚᱨ ᱦᱮᱡ ᱟᱭ ᱠᱟᱱᱟ᱾ ᱚᱱᱟᱛᱮ ᱩᱱᱤᱭᱟᱜ ᱥᱚᱞᱦᱟ ᱟ.ᱰᱤ ᱜᱮ ᱛᱮᱦᱮᱧ ᱫᱚ ᱡᱟ.ᱨᱩᱲ ᱮ ᱟ.ᱭᱠᱟ.ᱣᱮᱫ ᱠᱟᱱᱟ᱾ ᱟᱱᱟᱛᱮ ᱩᱱᱤᱭᱟᱜ ᱫᱤᱥ-ᱦᱩᱫᱤᱥ ᱦᱟᱛᱟᱣ ᱞᱟᱜᱤᱫ ᱟ.ᱰᱤ ᱨᱮ ᱥᱮᱴᱮᱨ ᱟᱠᱟᱱᱟᱭ ᱦᱚᱯᱱᱟ ᱥᱚᱨᱮᱱ ᱟᱠ ᱚᱲᱟᱜ ᱨᱮ᱾ ᱦᱚᱯᱱᱟ ᱫᱚ ᱵᱷᱟ.ᱜᱽᱱᱟ.ᱛ ᱠᱚᱲᱟ ᱣᱟᱠ ᱱᱚᱣᱟ ᱟᱸᱡᱟᱢ ᱠᱟᱛᱮᱫ ᱟ.ᱰᱤ ᱜᱮᱭ ᱫᱷᱟᱜ ᱢᱟᱨᱟᱣᱮᱱᱟ ᱟᱨ ᱩᱥᱟ.ᱨᱟᱛᱮ ᱚᱸᱰᱮ ᱠᱷᱚᱱ ᱫᱚ ᱠᱤᱨᱛᱟ. ᱛᱮᱭ ᱠᱟᱞ ᱠᱮᱫᱮᱭᱟ᱾ ᱟᱢ ᱫᱚ ᱤᱧ ᱵᱮᱜᱟᱨ ᱛᱮ ᱫᱤᱥᱚᱢ ᱦᱚᱲ ᱮᱢ ᱦᱚᱦᱚᱣᱟᱠ ᱠᱚᱣᱟ ᱟᱨ ᱧᱤᱛᱽ ᱟᱢ ᱜᱮᱢ ᱧᱤᱨ ᱵᱟᱰᱟᱭ ᱠᱟᱱᱟ᱾ ᱫᱩ, ᱵᱮᱜᱚᱨ ᱵᱤᱞᱚᱢ ᱛᱮ ᱪᱟᱞᱟᱠ ᱢᱮ᱾

ᱵᱚᱨᱥᱚᱱ ᱠᱤᱨᱛᱟ.ᱭ ᱥᱮᱴᱮᱨᱚᱠ ᱞᱟᱦᱟ ᱨᱮᱜᱮ ᱯᱩᱞᱤᱥ ᱫᱚᱠᱚ ᱥᱮᱴᱮᱨ ᱴᱷᱤᱠᱽ ᱟᱠᱟᱱ ᱛᱟᱦᱮᱸ ᱠᱟᱱᱟ᱾ ᱟᱨ ᱱᱤᱛ ᱠᱤᱨᱛᱟ. ᱦᱟ.ᱴᱤᱭᱟ. ᱠᱷᱚᱱ ᱯᱟ.ᱪᱷᱤᱢ-ᱫᱟ.ᱠᱷᱤᱱ ᱠᱚᱱᱟ ᱥᱮᱫ ᱨᱮ ᱢᱮᱱᱟᱜ ᱵᱳᱞ ᱮᱱᱮᱡ ᱴᱟᱺᱰᱤ ᱫᱚᱥᱱᱟ ᱥᱮᱫ ᱨᱮ ᱫᱤᱥᱚᱢ ᱦᱚᱲ ᱠᱚ ᱚᱱᱢᱟᱱᱮᱠ ᱠᱚ ᱛᱟᱦᱮᱸ ᱠᱟᱱᱟ᱾ ᱮᱱᱛᱮᱫ ᱫᱤᱥᱚᱢ ᱦᱚᱲ ᱫᱚ ᱒᱕ ᱡᱩᱱ ᱑᱙᱕᱖ ᱦᱤᱞᱚᱜ ᱟᱭᱩᱯ ᱵᱮᱲᱟ ᱠᱷᱚᱱ ᱜᱮ ᱠᱤᱨᱛᱟ. ᱴᱟᱺᱰᱤ ᱨᱮ ᱥᱮᱴᱮᱨᱚᱜ ᱫᱚ ᱠᱚ ᱮᱦᱚᱯ ᱟᱠᱟᱱ ᱛᱟᱦᱮᱸᱠᱟᱱᱟ᱾

ᱟᱰᱮ ᱴᱚᱞᱟ ᱨᱮᱱᱟᱜ ᱥᱟᱱᱟᱢ ᱟᱛᱳ ᱠᱚ ᱜᱮ ᱴᱟᱢᱟᱠᱽ ᱥᱟᱰᱮ ᱛᱮ ᱟᱸᱫᱚᱲ ᱪᱟᱵᱟᱣᱟᱠᱟᱱ ᱛᱟᱦᱮᱸᱠᱟᱱᱟ᱾ ᱥᱟᱱᱟᱢ ᱥᱳᱨ ᱥᱟᱺᱜᱤᱱ ᱟᱛᱳ ᱨᱟᱱ ᱦᱚᱲ ᱴᱟᱢᱟᱠᱽ ᱥᱟᱰᱮ ᱟᱸᱡᱚᱢ ᱠᱟᱛᱮ ᱪᱷᱤᱞ-ᱵᱤᱞᱟ.ᱜ ᱪᱟᱵᱟᱣᱟᱠᱟᱱ ᱛᱟᱦᱮᱸᱠᱟᱱᱟ᱾ ᱥᱟᱱᱟᱢ ᱟᱛᱳ ᱨᱮᱜᱮ ᱦᱟᱯᱮᱭᱟ ᱛᱟᱸᱜᱤᱭᱤᱧ ᱢᱮ ᱮᱢᱟᱱ ᱞᱮᱠᱟᱱ ᱠᱟᱛᱷᱟ ᱛᱮ ᱠᱟ.ᱣᱟ.-ᱨᱟ.ᱣᱟ. ᱪᱟᱵᱟᱣᱟᱠᱟᱱ ᱛᱟᱦᱮᱸᱠᱟᱱᱟ᱾ ᱱᱚᱝᱠᱟ ᱟᱴᱠᱟᱨᱚᱜ ᱠᱟᱱᱟ, ᱵᱟᱝ ᱢᱟ ᱠᱤᱨᱛᱟ. ᱰᱟᱸᱜᱽᱨᱟ ᱨᱮ ᱥᱮᱞᱮᱫᱚᱜ ᱞᱟ.ᱜᱤᱫ ᱦᱚᱲ ᱫᱚ ᱛᱤᱱᱟ.ᱜ ᱪᱚᱠᱚ ᱠᱚᱭᱚᱜ ᱛᱷᱟᱠᱟᱣ ᱪᱟᱵᱟᱣᱟᱠᱟᱱ ᱛᱟᱦᱮᱸᱠᱟᱱᱟ᱾ ᱢᱮᱱᱠᱷᱟᱱ ᱛᱮᱦᱮᱧ ᱫᱚ ᱵᱷᱟᱜᱤ ᱥᱮᱴᱮᱨ ᱜᱚᱫ ᱟᱠᱟᱱᱟ᱾ ᱟᱛᱳ ᱛᱚᱞᱦᱟᱸᱴᱽ ᱨᱮ ᱡᱚᱸᱰᱽᱨᱟ ᱯᱚᱯᱚ ᱵᱟᱛᱟᱨ ᱟᱠᱟᱱ ᱛᱟᱦᱮᱸ ᱨᱮᱦᱚᱸ ᱚᱠᱚᱭ ᱦᱚᱸ ᱵᱟᱲᱜᱤ ᱥᱮᱫ ᱪᱟᱞᱟᱣ ᱫᱚ ᱵᱟᱝ ᱠᱚ ᱜᱚᱴᱟᱭᱮᱫ ᱛᱟᱦᱮᱸᱠᱟᱱᱟ᱾ ᱵᱚᱨᱚᱝ ᱠᱩᱰᱤ, ᱴᱟ.ᱢᱱᱤ ᱥᱟᱵ ᱠᱟᱛᱮ ᱥᱟᱸᱣᱛᱟ ᱫᱚᱨᱚᱫᱤᱭᱟ. ᱵᱮᱱᱟᱣ ᱠᱟᱛᱮ ᱠᱤᱨᱛᱟ. ᱰᱟᱸᱜᱽᱨᱟ ᱥᱮᱫ ᱜᱮᱠᱚ ᱟ.ᱯᱤᱨ ᱪᱟᱞᱟᱣ ᱠᱟᱱ ᱛᱟᱦᱮᱸ ᱠᱟᱱᱟ᱾

ᱱᱚᱛᱮ ᱯᱩᱞᱤᱥ ᱠᱚ ᱢᱩᱫᱽ ᱠᱷᱚᱱ ᱦᱚᱲ ᱠᱚᱲᱟ ᱦᱚᱸ ᱠᱚ ᱛᱟᱦᱮᱸ ᱠᱟᱱᱟ᱾ ᱟᱨ ᱯᱷᱟ.ᱫᱽ ᱦᱚᱲ ᱠᱚ ᱟᱞᱚᱯᱮ ᱞᱟᱦᱟᱜ ᱟ ᱢᱮᱱ ᱠᱟᱛᱮ ᱠᱚ ᱵᱟᱨᱚᱱᱮᱫ ᱠᱚ ᱛᱟᱦᱮᱸᱠᱟᱱᱟ᱾ ᱢᱮᱱᱠᱷᱟᱱ ᱥᱟᱱᱛᱟᱲ ᱯᱷᱟ.ᱫᱽ ᱫᱚ ᱵᱟᱝ ᱜᱮᱠᱚ ᱵᱟᱛᱟᱣ ᱮᱫ ᱠᱟᱱ ᱛᱟᱦᱮᱸᱠᱟᱱᱟ ᱟᱨ ᱞᱟᱦᱟ ᱥᱮᱫ ᱜᱮᱠᱚ ᱞᱟᱦᱟ ᱤᱫᱤᱠ ᱠᱟᱱ ᱛᱟᱦᱮᱸᱠᱟᱱᱟ᱾ ᱠᱩᱰᱤ, ᱴᱟ.ᱢᱱᱤ, ᱟᱨ ᱴᱮᱸᱜᱚᱡ ᱮᱢᱟᱱ ᱠᱚ ᱯᱩᱞᱤᱥ ᱥᱟᱢᱟᱝ ᱨᱮᱠᱚ ᱢᱟᱜ ᱵᱤᱫ ᱮᱛ ᱛᱟᱦᱮᱸᱠᱟᱱᱟ᱾ ᱟᱸᱜ-ᱥᱟᱨ ᱠᱚ ᱯᱩᱞᱤᱥ ᱥᱟᱱ ᱜᱮᱠᱚ ᱴᱩᱱᱤᱭᱟ. ᱵᱟᱲᱟᱭᱮᱫ ᱛᱟᱦᱮᱸᱠᱟᱱᱟ᱾

ᱵᱚᱨᱥᱚᱱ ᱠᱤᱨᱛᱟ. ᱴᱟᱺᱰᱤᱭ ᱥᱮᱴᱮᱨ ᱮᱱ ᱥᱟᱸᱣ ᱛᱮ ᱫᱤᱥᱚᱢ ᱦᱚᱲ ᱫᱚᱠᱚ ᱛᱩᱫᱨᱟ. ᱮᱥᱮᱫ ᱠᱮᱫᱮᱭᱟ ᱟᱨ ᱵᱚᱰᱜᱮ ᱛᱮᱠᱚᱣᱟᱠ ᱚᱲᱟᱠ ᱩᱫᱩᱠ ᱟᱠᱚ ᱞᱟᱜᱤᱫ ᱠᱚ ᱢᱮᱛᱟ ᱫᱮᱭᱟ᱾ ᱵᱚᱨᱥᱚᱱ ᱫᱚ ᱟᱭᱢᱟ ᱞᱮᱠᱟᱱᱟᱜ ᱦᱩᱫᱤᱥ ᱛᱮ ᱦᱚᱦᱚᱜ ᱫᱚ ᱦᱟᱢᱟᱞ ᱟᱠᱟᱱ ᱛᱟᱭᱟ᱾

ᱫᱤᱥᱚᱢ ᱦᱚᱲᱟᱠ ᱠᱟᱛᱷᱟ ᱞᱮᱠᱟᱛᱮ ᱳᱰᱳᱠᱽ ᱩᱫᱩᱜ ᱦᱩᱭᱩᱜ ᱠᱟᱱ ᱛᱟᱭᱟ᱾ ᱵᱚᱨᱥᱚᱱ ᱢᱩᱨᱢᱩ ᱫᱚ ᱫᱤᱥᱚᱢ ᱦᱚᱲ ᱠᱚᱭ ᱟ.ᱭᱩᱨ ᱠᱮᱫ ᱠᱟᱣᱟ, ᱢᱮᱱᱟᱜ ᱩᱱ ᱚᱠᱛᱚ ᱜᱮ ᱯᱩᱞᱤᱥ ᱫᱚ ᱳᱱᱠᱳ ᱟᱞᱚ ᱞᱟᱦᱟᱜ ᱞᱟ.ᱜᱤᱫ ᱠᱚ ᱢᱟᱱᱟ ᱠᱮᱫ ᱠᱚᱣᱟ᱾ ᱩᱱ ᱨᱮᱜᱮ ᱢᱤᱫ ᱴᱟ.ᱱ ᱦᱚᱲ ᱫᱚ ᱚᱠᱟ ᱢᱟᱫ ᱜᱟᱡᱟᱲ ᱠᱷᱚᱱ ᱪᱚ ᱟᱸᱜ-ᱥᱟᱨᱮ ᱛᱩᱧ ᱜᱚᱫ ᱠᱮᱫᱟᱭ ᱯᱩᱞᱤᱥ ᱥᱮᱫ ᱟᱨ ᱱᱚᱛᱮ ᱥᱟᱢᱟᱝ ᱨᱮᱱ ᱦᱚᱲ ᱦᱚᱸ ᱠᱩᱰᱤ, ᱴᱟ.ᱢᱱᱤ, ᱟᱨ ᱴᱮᱸᱜᱚᱡ ᱮᱢᱟᱱ ᱠᱚ ᱢᱟᱜ ᱵᱤᱫ ᱮᱫᱟ ᱯᱩᱞᱤᱥ ᱥᱟᱢᱟᱝ ᱨᱮ᱾ ᱱᱚᱣᱟ ᱠᱚ ᱧᱮᱞ ᱛᱮ ᱯᱩᱞᱤᱥ ᱫᱚ ᱫᱮᱭᱟ-ᱫᱮᱭᱟ ᱠᱚ ᱢᱤᱫ ᱛᱟᱠᱚᱣᱟ ᱟᱨ ᱜᱚᱴᱟ ᱵᱮᱲᱟ ᱠᱚ ᱜᱩᱞᱤ ᱪᱟᱞᱟᱣ ᱠᱚ ᱮᱦᱚᱵ ᱠᱮᱫᱟ᱾ ᱛᱟᱦᱟᱸᱲ-ᱱᱟᱦᱟᱸᱲ ᱦᱚᱲ ᱠᱚ ᱵᱷᱤᱸᱫᱟ.ᱲ ᱮᱱᱟ, ᱜᱚᱡ ᱮᱱᱟ᱾

ᱥᱟᱱᱟᱢ ᱜᱚᱡ ᱵᱟᱜᱚᱡ ᱡᱚᱛᱚ ᱜᱮ ᱴᱮᱨᱟᱠᱽ ᱨᱮ ᱞᱟᱫᱮ ᱠᱟᱛᱮ ᱠᱚ ᱤᱫᱤ ᱠᱮᱫ ᱠᱚᱣᱟ ᱟᱨ ᱛᱚᱲᱟᱭ ᱜᱟᱰᱟ ᱨᱮ ᱠᱚ ᱟ.ᱛᱳ ᱜᱚᱫ ᱠᱟᱫ ᱠᱚᱣᱟ᱾ ᱦᱚᱯᱱᱟ ᱥᱚᱨᱮᱱᱟᱜ ᱞᱟ.ᱭ ᱞᱮᱠᱟᱛᱮ, ᱠᱤᱨᱛᱟ. ᱢᱟ.ᱡᱷᱤ ᱦᱟᱲᱟᱢ ᱟᱨ ᱥᱤᱨᱤᱥᱴᱚᱞᱟ ᱨᱟᱱ ᱢᱟᱱᱳᱦᱟᱨ ᱛᱤᱞᱤ ᱫᱚ ᱯᱩᱞᱤᱥ ᱜᱮ ᱟᱠᱚ ᱛᱟᱞᱟ ᱨᱮ ᱚᱨ ᱟᱫᱮᱨ ᱠᱟᱛᱮᱫ ᱠᱚ ᱵᱟᱧᱪᱟᱣ ᱞᱮᱫ ᱠᱤᱱᱟ᱾ ᱯᱩᱞᱤᱥ ᱠᱚ ᱢᱟᱦᱮᱥᱯᱩᱨ ᱟᱨ ᱫᱮᱵᱽᱯᱩᱨ ᱥᱮᱫ ᱪᱟᱞᱟᱣ ᱟᱠᱟᱱ ᱰᱟᱦᱟᱨ ᱥᱮᱫ ᱜᱮ ᱡᱟ.ᱥᱛᱤ ᱜᱩᱞᱤ ᱫᱚᱠᱚ ᱟᱲᱟᱜ ᱠᱮᱫᱟ᱾ ᱱᱚᱣᱟ ᱜᱷᱚᱴᱚᱱᱟ ᱨᱮ ᱡᱟ.ᱥᱛᱤ ᱫᱚ ᱥᱟᱺᱜᱤᱧ ᱥᱮᱫ ᱨᱮᱱ ᱦᱚᱲ ᱜᱮᱠᱚ ᱜᱚᱡ ᱞᱮᱱᱟ᱾ ᱥᱩᱨ ᱨᱮᱱ ᱫᱚ ᱱᱳᱠᱳ ᱠᱚ ᱦᱚᱲ ᱜᱩᱞᱤ ᱫᱚ ᱯᱟᱲᱟᱣᱟᱫ ᱠᱚ ᱛᱟᱦᱮᱸᱠᱟᱱᱟ --
᱑. ᱞᱚᱠᱷᱚᱱ ᱦᱮᱢᱵᱽᱨᱚᱢ, ᱡᱟᱸᱜᱟ ᱨᱮ, ᱡᱤᱻᱣᱤᱫ ᱮᱱᱟᱭ, ᱞᱚᱜᱟᱸᱣ᱾
᱒. ᱥᱟᱭᱵᱟ ᱢᱟ.ᱨᱰᱤ, ᱞᱮᱸᱜᱟ ᱦᱚᱲᱢᱚ, ᱡᱤᱻᱣᱤᱫ ᱮᱱᱟᱭ, ᱞᱚᱜᱟᱸᱣ᱾
᱓. ᱢᱟ.ᱡᱷᱤ ᱦᱟᱲᱟᱢ, ᱛᱟ.ᱥᱟ.ᱨᱤᱭᱟ. ᱟᱛᱳ ᱨᱮᱱ, ᱜᱚᱡ ᱮᱱᱟᱭ᱾
᱔. ᱦᱚᱢᱚᱨᱯᱩᱨ ᱟᱛᱳ ᱨᱮᱱ, ᱞᱟᱡ ᱨᱮ, ᱜᱚᱡ ᱮᱱᱟᱭ᱾
᱕. ᱵᱚᱨᱥᱚᱱ, ᱫᱷᱟᱣᱟᱰᱟᱸᱜᱟᱞ, ᱡᱟᱸᱜᱟ ᱨᱮ, ᱡᱤᱻᱣᱟᱫ ᱮᱱᱟᱭ᱾

᱒᱖ ᱡᱩᱱ ᱑᱙᱕᱖ ᱨᱮᱭᱟᱜ ᱱᱚᱣᱟ ᱰᱟᱸᱜᱽᱨᱟ ᱠᱟ.ᱢᱤ ᱦᱚᱨᱟ ᱫᱚ ᱟᱥᱮ-ᱯᱟᱥᱮ ᱨᱮᱱ ᱥᱟᱱᱟᱢ ᱦᱚᱲᱟᱜ ᱞᱩᱛᱩᱨ ᱨᱮ ᱟ.ᱰᱤ ᱫᱤᱱ ᱫᱷᱟ.ᱵᱤᱡ ᱵᱟᱺᱫᱩᱠᱽ ᱥᱟᱰᱮ ᱨᱮᱱᱟᱠ ᱟᱲᱟᱝ ᱫᱚ ᱨᱟᱸᱣᱟᱜ ᱛᱮᱜᱮ ᱛᱟᱦᱮᱸᱠᱟᱱᱟ᱾ ᱟᱥᱮ-ᱯᱟᱥᱮ ᱨᱟᱱ ᱥᱟᱱᱟᱢ ᱵᱟᱵᱟ ᱦᱚᱲ ᱠᱚᱫᱚ ᱟᱯᱟᱱ-ᱟ.ᱯᱤᱱ ᱡᱤᱻᱣᱤ ᱵᱟᱧᱪᱟᱣ ᱠᱟᱛᱮ ᱥᱟᱺᱜᱤᱧ-ᱥᱟᱺᱜᱤᱧ ᱯᱮᱲᱟ ᱚᱲᱟᱜ ᱠᱚ ᱨᱮ ᱠᱚ ᱳᱠᱳ ᱵᱟᱲᱟᱭ ᱠᱟᱱ ᱛᱟᱦᱮᱸᱫ ᱠᱟᱱᱟ᱾ ᱟᱡ ᱱᱤᱡᱽ ᱦᱚᱯᱱᱟ ᱥᱚᱨᱮᱱ ᱦᱚᱸ ᱟᱡᱟᱜ ᱤᱥᱠᱩᱞ ᱵᱟ.ᱜᱤ ᱠᱟᱛᱮ ᱵᱷᱤᱡᱟ.ᱭ ᱵᱟᱨᱚᱢᱟ.ᱥᱤᱭᱟ ᱥᱮᱫ ᱮ ᱫᱟ.ᱲ ᱟᱠᱟᱫᱟᱭ᱾

ᱛᱷᱚᱲᱟ ᱫᱤᱱ ᱯᱚᱨᱮ ᱜᱮ ᱥᱚᱨᱠᱟᱨ ᱯᱟᱦᱴᱟ ᱥᱮᱱ ᱠᱷᱚᱱ ᱟᱛᱳ ᱛᱚᱞᱦᱟᱸᱴᱽ ᱨᱮ ᱥᱩᱞᱩᱠᱽ ᱵᱟᱦᱟᱞ ᱞᱟ.ᱜᱤᱫ ᱛᱮ ᱦᱚᱲ ᱠᱚ ᱵᱩᱡᱷᱟ.ᱣ ᱟᱠᱚ ᱠᱟᱱ ᱛᱟᱦᱮᱸᱠᱟᱱᱟ᱾ ᱩᱱ ᱨᱮᱜᱮ ᱦᱚᱯᱱᱟ ᱥᱟᱨᱮᱱ ᱱᱚᱣᱟ ᱠᱟ.ᱢᱤ ᱞᱟ.ᱜᱤᱫ ᱠᱚ ᱧᱟᱢ ᱟ.ᱜᱩ ᱠᱮᱫᱮᱭᱟ, ᱡᱮᱢᱚᱱ ᱩᱱᱤ ᱦᱚᱸ ᱟᱭᱟᱜ ᱤᱥᱠᱩᱞᱮ ᱪᱟᱞᱟᱣ ᱟᱨ ᱟᱥᱮ-ᱯᱟᱥᱮ ᱨᱮᱱ ᱦᱚᱲ ᱠᱚᱭ ᱵᱩᱡᱷᱟ.ᱣᱟᱠᱚᱢᱟᱭ ᱡᱮᱢᱚᱱ ᱟᱠᱚ ᱚᱲᱟᱠ ᱛᱮᱠᱚ ᱨᱩᱣᱟ.ᱲ ᱦᱤᱡᱩᱜ ᱛᱮ ᱪᱟᱥ-ᱵᱟᱥ ᱠᱟ.ᱢᱤ ᱠᱚ ᱥᱟᱢᱵᱽᱴᱟᱣ ᱛᱟᱠᱚ ᱢᱟ᱾ ᱦᱚᱯᱱᱟ ᱥᱚᱨᱮᱱ ᱫᱚ ᱟᱭᱢᱟ ᱫᱤᱱ ᱦᱟ.ᱵᱤᱫ ᱟᱛᱳ-ᱟᱛᱳ ᱪᱟᱞᱟᱣ ᱠᱟᱛᱮᱫ ᱦᱚᱲ ᱠᱚᱭ ᱵᱩᱡᱷᱟ.ᱣ ᱟᱠᱚ ᱠᱟᱱ ᱛᱟᱦᱮᱸᱠᱟᱱᱟ᱾ ᱟᱨ ᱵᱟ.ᱭ-ᱵᱟ.ᱭ ᱛᱮ ᱥᱟᱱᱟᱢ ᱫᱟ.ᱲ ᱠᱮᱫ ᱦᱚᱲ ᱫᱚ ᱠᱚ ᱨᱩᱣᱟ.ᱲ ᱦᱮᱡ ᱪᱟᱵᱟ ᱮᱱᱟ ᱠᱚ᱾ ᱠᱤᱨᱛᱟ. ᱰᱟᱸᱜᱽᱨᱟ ᱛᱟᱭᱚᱢ ᱵᱚᱨᱥᱚᱱ ᱢᱩᱨᱢᱩ ᱫᱚ ᱠᱚ ᱱᱚᱡᱚᱨ ᱵᱚᱸᱫᱽ ᱧᱚᱠ ᱞᱮᱫᱮᱭᱟ᱾ ᱢᱮᱱᱮᱡ ᱦᱚᱯᱱᱟ ᱥᱚᱨᱮᱱ ᱜᱮ ᱩᱱᱤ ᱫᱚᱭ ᱪᱷᱟᱰᱟᱣ ᱟ.ᱜᱩ ᱠᱮᱫᱮᱭᱟ᱾ ᱜᱷᱚᱴᱚᱱᱟ ᱛᱟᱭᱚᱢ ᱵᱚᱰᱜᱮ ᱟᱨ ᱠᱟ.ᱭᱵᱟ.ᱛᱽ ᱠᱚᱲᱟ ᱫᱚᱠᱤᱱ ᱚᱠᱟᱭᱮᱱᱟ, ᱱᱚᱣᱟ ᱨᱮᱭᱟᱜ ᱠᱷᱳᱡᱽ-ᱛᱟᱞᱟᱥ ᱦᱚᱸ ᱠᱤᱨᱛᱟ. ᱰᱟᱸᱜᱽᱨᱟ ᱥᱟᱸᱣ ᱛᱮᱜᱮ ᱟᱸᱜᱤᱱ ᱮᱱᱟ᱾

᱕᱐-᱗᱐ ᱜᱚᱴᱟᱱ ᱯᱩᱞᱤᱥ-ᱯᱚᱨᱥᱟᱥᱚᱱᱟᱠ ᱵᱟᱺᱫᱩᱠᱽ ᱨᱮᱭᱟᱜ ᱥᱟᱰᱮ ᱟ.ᱡᱚᱢ ᱠᱟᱛᱮ ᱵᱚᱛᱚᱨ ᱞᱮᱱ ᱦᱚᱲ ᱢᱟᱠᱚ ᱨᱩᱣᱟ.ᱲ ᱦᱮᱡ ᱮᱱᱜᱮ, ᱢᱮᱱᱮᱡ ᱥᱟᱱᱛᱟᱲ ᱥᱟᱸᱣᱛᱟ ᱨᱮᱱ ᱥᱟ.ᱨᱤ ᱤᱛᱟ. ᱢᱮᱱᱛᱮ ᱚᱠᱚᱭ ᱠᱚ ᱛᱟᱦᱮᱸ ᱠᱳᱱ, ᱩᱱᱠᱩᱣᱟᱠ ᱥᱟᱱᱛᱟᱲ ᱫᱚᱨᱚᱫᱤᱭᱟ. ᱟᱲᱟᱝ ᱫᱚ ᱡᱚᱱᱚᱢ-ᱡᱚᱱᱚᱢ ᱞᱟ.ᱜᱤᱫ ᱵᱟᱺᱫᱩᱠᱽ ᱨᱮᱭᱟᱜ ᱟᱲᱟᱝ ᱥᱟᱸᱣ-ᱥᱟᱸᱣ ᱛᱮ ᱜᱮ ᱪᱟᱞᱟᱣ ᱛᱚᱨᱟ ᱭᱮᱱᱟ, ᱟᱨ ᱥᱟᱨᱮᱡ ᱛᱟᱦᱮᱸ ᱩᱱᱠᱩ ᱣᱟᱠ ᱟᱲᱟᱝ ᱦᱚᱸ ᱠᱤᱨᱛᱟ. ᱰᱟᱸᱜᱽᱨᱟ ᱥᱟᱸᱣ ᱛᱮ ᱯᱚᱴᱟ ᱵᱷᱤᱛᱤᱨᱤ ᱨᱮ ᱟᱸᱜᱮᱱ ᱛᱟᱦᱮᱸ ᱮᱱᱟ᱾ ᱮᱱᱛᱮ ᱱᱤᱛ ᱦᱟ.ᱵᱤᱫ ᱛᱮ ᱦᱚᱸ ᱚᱱᱠᱟ ᱥᱟᱸᱣᱛᱟ ᱫᱚᱨᱚᱫᱤᱭᱟ. ᱟᱲᱟᱝ ᱫᱚ ᱮᱠᱟᱞ ᱜᱮ ᱟ.ᱣᱨᱤ ᱨᱟᱠᱟᱵᱚᱠ ᱟ ᱟᱨ ᱯᱟᱥᱮᱪ ᱵᱟᱭ ᱨᱟᱠᱟᱵᱚᱠ ᱟ ᱡᱩᱜᱽ-ᱡᱩᱜᱽ ᱦᱟ.ᱵᱤᱫ᱾

Read the English translation

Listen to the text in the original Santhali read by the author:

The Santhals are one of the largest indigenous communities in India. They are animists, following the Sarna religion, and speak the Santhali language.

Dangra, the subject of this memoir, is a penalty for deviating from the mores of the Santhal society. A Santhal woman who has a physical relationship with, or marries, a non-Santhal man; a Santhal man who has an incestuous relationship with a female blood relative, etc.—such men and women are subjected to dangra. It involves ransacking the houses of these men and women and destroying everything that they and their families possess. The walls, doors, and windows of their houses are destroyed so “immoral” Santhal men and women and their families do not have a place to stay. Rice, pulses, and other grains are scattered or thrown away so that the families do not have food to eat. Their crops and other plants are uprooted. Whole villages take part in a dangra, which is seen as a disciplinary measure among the Santhals. It is an effort—or a desire—of the Santhals to self-govern, and a method to preserve the honour and sanctity of the Santhal society so that no man or woman deviates from the moral path laid down by the society.

“Memories of the Kirta Dangra,” translated from the original Santhali work, “Kirta Dangra: Mid Huding Oporom,” by Shibu Tudu is my first published work of translation. The language used in the original work almost reads like a poem. I am not sure if my translation equals the beauty of the original, but I have tried to retain the spirit of the original Santhali work.

Shibu Tudu (born 1975) lives in Pakur, Jharkhand, and works as a teacher at the Upgraded Middle School, Sawlapur. He writes poems and short stories in Santhali. His published works include a collection of poems, Tirla (Teenage Girl), published in 2016, and Turui Maha (Six Days), a nonfiction work on the importance of Sohrai, the harvest festival of the Santhals, published in 2007. Tudu, while writing poetry, often uses the nom de plume “Hisaliya.” Hisaliya means a person who is envious of other people’s achievements. Tudu chose to call himself Hisaliya because he hoped that envying other people's achievements would inspire him to achieve similar feats or something even greater.

Hansda Sowvendra Shekhar (born 1983) is the author of a novel, The Mysterious Ailment Of Rupi Baskey, which won the Sahitya Akademi Yuva Puraskar 2015, jointly won the Muse India-SatishVerma Young Writer Award 2015, was shortlisted for The Hindu Prize 2014 and a Crossword Book Award 2014, and was longlisted for the International Dublin Literary Award 2016. His collection of short stories, The Adivasi Will Not Dance, was shortlisted for The Hindu Prize 2016 and has been recommended for a course at the Indian Institute of Management, Ahmedabad. Several other works of fiction, nonfiction, and photography have been published in The International New York Times, The Asian Age, The Times of India, The Indian Express, The Hindu Business Line, Scroll, Mint Lounge, Alchemy: The Tranquebar Book Of Erotic Stories II, American Book Review, and other places. “Memories of the Kirta Dangra” is his first published work of translation. More details are available here.